BACOLOD CITY — Kalipay kag pagpasalamat ang nabatyagan sang mga miyembro sang Negrense softball team nga nagtiglawas sa Asia-Pacific Region sa Little League Seniors Division Softball World Series sa Estados Unidos kag nagtapos bilang 2nd placer ukon silver medalist kadungan sang ila nga pagpauli diri sa probinsya.
Pasado alas 7:00 sang Miyerkules sang aga sang nag-abot sa Bacolod Silay Airport ang 12 ka softball players, tatlo ka coaches kag lima ka opisyal sang Department of Education halin sa World Series sa Delaware, USA.
Sa exclusive interview sang Bombo Radyo kay Coach Roselle Hulleza, dako ang ila kalipay bangud bisan silver medalist lamang ang team, apang naayawan man ang ila kontra halin sa elimination rounds padulong sa finals.
Dalagko ang mga humalampang sang iban nga pungsod apang bentaha naman ang mga Negrense players bangud hilway sila nga makahulag sang madasig.
Ginkalipay man sini nga wala sang napilasan sa mga humalampang kag wala man naglain ang ila pamatyag.
Suno kay Hulleza, yara sa husto nga kondisyon ang mga Negrense players, magluwas lamang sa ila pag-adjust sa pagkaon bangud wala sang kan-on sa Estados Unidos.
