Ginalantaw sang convenor sang Utilities Consumer Advocate for Reforms nga ang pagkatukib sang masobra 6,000 illegal connections sa Central Negros Electric Cooperative (CENECO) ang nagapakita nga luyag sang Negros Electric and Power Corp. (NEPC) nga ini ang masolusyunan.
Sa interview sang Bombo Radyo Bacolod kay Roy Cordova, nga sadto miyembro man sa Board of Directors sang CENECO, yara siya sa ginpatigayon nga Negros Electric Power Forum nakaligad nga semana, kag nabatian sini mismo sang gindisclose ni NEPC President kag Chief Executive Officer Roel Castro ang natuhoy sa illegal connections.
Nagapati ini nga sa intensyon nga mabuligan ang CENECO, ang NEPC ang nagpatigayon sang initial mapping.
Suno kay Cordova, may-ara sang Republic Act 7832 ukon Anti-Electricity Pilferage Act, nga mahimo lakipan sang pagtamper sa dial sang metro, magjumper ang kuryente sa poste kag flying connection ukon pagtap sa balay nga may kuryente.
Ang flying connection ukon house-to-house connection naman suno diri ang pinakamadamo, nga nagabayolar gihapon sa layi apisar nga ini ang nagalabay sa metro sang nagpahanugot sang tapping.
Ini bangod may polisa nga isa dapat ka metro sa kada consumer.
Apang nakita man ni Cordova nga mahimo madamo sang ginapili nalang magtapping bangod sa tuman ka damo nga mga requirements antes makapatakod sang kuryente.
Ginapakamaayo sini nga isa sa programa sang NEPC sa tion nga sila na ang magamanage sa power distribution, nga mapahapos kag mapadasig ang proseso sa pagtakod sang kuryente kag maplastar sang maayo ang service connection.
Pinaagi sini, mapanubo ang system losses nga masami ginapalukdo sa mga konsumedor.
Suno kay Cordova, sang siya ang member pa sang Board nagsumiter ini sang “system loss reduction program” apang wala ini sang ihibalo kun napatuman ang programa.
Paathag naman sini nga may System Loss Reduction Unit ang CENECO, nga amo ang dapat nagapatigayon sang routine inspection sa mga balay-balay kag naga-imbestigar kun may mabatun nga tipster.
