Ginalauman sang tagpamaba sang Negros Electric and Power Corporation nga posible nga magdangat lamang sa duha ka bulan kag magrant na ang franchise sang Negros Electric and Power Corporation (NEPC) basta wala sang balabag kag tayuyon ang lakat sang proseso.
Sa interview sang Bombo Radyo kay Jonathan Cabrera, ginakilala sini ang nangin trabaho sang Central Negros Electric Cooperative apang sa idalum sang NEPC mas mahatagan pa gid sang mas maayo nga serbisyo ang mga kunsomedor.
Suno diri, matapos ang sponsorship ni Senator Grace Poe, bilang chairperson sang Public Services Committee, maagi na sa debate sa senate ang franchise kag diri pagadepensahan sang senadora ang ginsponsoran sini nga paggrant sang franchise sang NEPC.
Pahayag ni Cabrera, kun normal kag tayuyon kag wala sang balabag sa lakat sang proseso, posible nga matapos ang duha ka bulan, maaprubahan na ang prangkisa.
Samtang, kasubong man nga nagpasalig ini nga klaro nga ang mga empleyado sang CENECO hatagan sang prayoridad nga ma-employ kun luyag pa nila nga magtrabaho.
