Ginakonsiderar sa karun ang pagbaylo sang pangalan sang Negros Island Region bilang ‘Negros And Siquijor Island Region’ ukon NASIR.
Sa interview kay Bacolod City Mayor Alfredo ‘Albee’ Benitez, matapos ginpirmahan ni President Ferdinand ‘Bongbong’ Marcos Jr. ang Republic Act 12000 ukon Negros Island Region Act, ini ang nagpalapit sa mga opisyal kag nag-ako nga ini ang may apprehension sa pagsugot nga dugangan ang rehiyon.
Ini bangod kadungan sa pagdugang sang rehiyon, magakahulugan man sang dugang nga budget.
Dugang pa sang Presidente nga kun ang problema amo ang kalayuon sang Regional Offices, sarang naman nga makatransaksyon online.
Apang nabatian sini ang pagduso sang mga gobernador kag mga kongresista sa hagna, kag sa pagpakita sang mga ini sa benepisyo sang NIR, gani ini ang ginpahanugutan sang Presidente.
Paathag ni Benitez nga may 15 pa ka adlaw para sa publication sang hagna kag 60 ka adlaw para sa paghuman sang Technical Working Group sang Implementing Rules and Regulations (IRR).
Apisar nga si Benitez ang chairman sa Regional Development Council sang Region 6, paathag sini nga kinahanglan pa sang desisyon sang imbulbado nga mga probinsya kun siya gihapon ang ibutang sa pwesto para sa Negros Island Region.
Sa karun, nakabatun na sila sang proposal sa pag-ilis sang pangalan sang rehiyon sa Negros And Siquijor Island Region (NASIR).
Nagapati naman ang alkalde nga ang mga ahensya sang gobyerno ang maga-alokar sang sobra nga budget para sa pagplastar sang bisan temporary offices sa Negros Island Region ilabi na nga sa 2025 pa malauman ang budget para sa bag-o nga rehiyon.
