Ginkumpirmar sang Provincial Health Office nga ma-activate ang probinsya sang Provincial Disease and Control Committee (PDACC) agud magtutok sa 2019 novel coronavirus.
Nahibaluan nga kahapon may yara na sang isa ka kumpirmado nga kaso sang nCoV sa Pilipinas.
Sa interview sang Bombo Radyo Bacolod kay Provincial Health Officer Dr. Ernell Tumimbang, ginpahayag sini nga plano nila maglunsyar sang PDACC sa Martes, alas-9:00 tubtob alas-9:30 sa aga kaupod si Governor Euegenio Jose Lacson kag miyembro sang Sangguniang Panlalawigan.
Suno kay Tumimbang, kadungan sang pag-activate sang nasambit nga komitiba, magahatag man siya sang update nahanungod sa status sang virus sa luwas sang pungsod kag subong man sa Pilipinas kag sa Western Visayas.
Diri man paga-istoryahan kun ano nga mga tikang ang dapat nga himuon sang probinsya.
Ginhatagan pagtamod man ni Tumimbang nga untaton na ang pagpati nga tanan nga mga Chinese ang positibo ukon carrier sang virus.
Suno diri, madamo sang Chinese sa Negros Occidental gani indi dapat sila pag-igeneralize.
Paathag sini, makabig lamang nga high-risk sa nCoV ang isa ka persona kun nagasufrer ini sang sintomas sang flu kag may yara sang travel history sa luwas sang pungsod nga may mga positibo nga kaso sang coronavirus ilabi na sa China.
Panugyan sini sa publiko nga mangin mabinantayon lamang sa palibot kag indi mag-panic.
