Ginkumpirmar sang Provincial Health Officer nga may napatay nga isa ka positibo nga kaso sang Pertussis sa Negros Occidental.
Ini ang gina-alegar duha ka bulan nga lapsag, apang wala na ginbuyagyag kun sa diin ini nga banwa ukon ciudad nagapuyo.
Sa kumpirmasyon ni Negros Occidental Provincial Health Officer Dr. Girlie Pinongan, 10 na ang nakabalik nga resulta sang confirmatory test nga ginpadala sa Research Institute for Tropical Medicine.
Suno diri, lima sa nakabalik nga resulta ang negatibo, samtang may lima naman nga positibo.
Apang paathag sini nga ang lapsag nga gin-admit sa Corazon Locsin Montelibano Memorial Regional Hospital, ang napatay antes paman maka-abot ang resulta sang confirmatory test.
Apang suno kay Pinongan, may 26 pa ka mga specimen sample nga ginpadala sa RITM nga padayun pa nga ginahulat ang resulta.
Ang mga ini ang may age-range nga isa ka bulan nga lapsag tubtob 62 anyos.
Bangod sa mga kaso, isa sa tikang nga plano sang probinsya amo ang pagbakal sang 100,000 doses sang vaccine para sa Pertussis.
Ini bangod madugay pa kun hulaton sang probinsya ang bakuna gikan sa Department of Health (DOH).
Pasalig naman ni Pinongan nga manageable pa ang kaso sang Pertussis sa probinsya kag indi man adlaw-adlaw may nagakarecord nga kaso.
Panawagan sini sa mga unvaccinated nga kabataan nga magpabakuna agud nga may-ara sang pambato sa mga balatian kaangay sang Pertussis nga ang first dose ang ginahatag sa ika-anom ka semana sang lapsag kag ang ikaduha nga dose ang ginahatag makaligad sang isa ka bulan.
