Ginpadulungan mismo sang pinuno sa Provincial Environment and Natural Resources Office sa Negros Occidental ang Nursery 1 Incorporated nga nagviral bangod sa mga ginpintahan nga bato sa suba sa Barangay Minoyan, Murcia.
Ang nasambitan nga propedad ang ginapanag-iyahan sang Russian National nga si Ivan Orlov, nga may-ara sang Bacolodnon nga live-in partner.
Sa interview sang Bombo Radyo Bacolod kay PENRO Head Engr. Joan Nathaniel Gerangaya, sila ang indi pwede nga magpagwa sang desisyon santo lamang sa nakita nga litrato sa social media, gani ila gid nga ginpadulungan ang lugar.
Kun matumod nga may violations ang result kasunod sang imbestigasyon, lantawon pa nila kun may makita nga remedy inkaso nga magsugot ang tag-iya nga irestore sa original state ang suba.
Paathag ni Gerangaya nga bisan pa non-toxic ang pinta nga gingamit sa linibo nga mga bato sang suba, nakapagkit sa Water Code of the Philippines nga indi pwede mabag-o ukon i-alter ang natural beauty sang mga suba.
Dugang pa sini nga ang suba ang propedad sang gobyerno kag indi mahimo mabaligya, kag ang mahimo lamang nga mapanag-iyahan sang pribado nga indibidwal amo ang kilid sang mga suba.
Sa inisyal, ginalantaw ni Gerangaya nga paglapas sa Anti-Vandalism Act kag Malicious Mischief ang mahimo ipasaka nga kaso batok sa tag-iya.
Magakonsulta man sila sa Department of Public Works and Highways (DPWH) angot sa mga structures nga gintukod sa river bed.
