Ginatugyan na sang Negros Occidental Police Provincial Office (NOCPPO) sa tagsa ka local government unit ang pagpatuman sang rerouting plan agud nga indi maapektuhan ang dalagan sang trapiko samtang ginaobserbar ang fiesta minatay.
Sa interview sang Bombo Radyo Bacolod kay Police Lt. Judesses Catalogo, spokesperson sang NOCPPO, may yara sang mga patrol cars nga magalibot sa tagsa ka area of responsibilities sang mga ini kag may yara man sang ideploy nga mga kapulisan para sa police assistance desk nga igabutang sa mga public kag private cemeteries sa probinsya sang Negros Occidental.
Nagpahanumdom si Catalogo sa mga himata sang mga minatay nga magabisita sa tagsa ka sementeryo sa probinsya nga ginadumilian ang pagdala sang mga matalom kag mataliwis nga bagay; ginadumilian ang pag-inum sang makahulubog nga ilimnon kag pagpatukar sang tuman ka tunog nga sounds.
Nagapanawagan man ini sang kooperasyon sang mga pumuluyo agud nga mangin matawhay kag malinong ang pag-obserbar sang fiesta minatay sa probinsya.
