Nagpatigayon ang Negros Occidental provincial government sang Valentine’s day celebration kahapon sang hapon, Pebrero 13, sa Capitol Park and Lagoon, Bacolod City.
Ang nasambit nga selebrasyon ang ginalakipan sang nagkalain-lain nga programa kag hinampang nga ginkalipay sang mga nagtambong.
May yara man sang pagpanagtag sang libre nga pagkaon para sa mga nagkadto.
Makit-an man ang isa ka madako nga teddy bear kag photobooth nga nagaporma tagipusuon.
Luwas diri, may ginpreparar nga pahampang ang probinsya nga ginhingadlan “Find the Governor’s Heart” kun sa diin pangitaon ang broken pieces nga tagipusuon sa palibot sang Capitol Lagoon.
Ang mga nagdaug ang nakaagom sang nagkalain-lain nga premyo lakip na diri ang tsokolate kag flower bouquet.
Samtang duha naman ang nakakuha sang grand prize nga P10,000 money bouquet.
Mensahe ni Governor Eugenio “Bong” Lacson, nga nagtambong man sa selebrasyon, ini ang pinakauna nga ginhiwat nga pre-Valentine’s day diri sa Bacolod City.
Samtang, nag-joke ang Gobernador nga anum na siya ka tuig nga wala na ka-date sa Valentine’s day.
Gintanyag man ni Gov. Lacson nga liwat naman nga magabukas ang gin-improbar nga Cafetolyo, kag amo man sa Comfort room (CR) nga suno diri “pwede matulogan” bangud airconditioned ini.
Ginpalab-ot ni Governor ang iya nga pagpasalamat sa mga nagtambong sa nangin madinalag-on nga selebrasyon sang pre-Valentine’s day.
