Ginpahayag sang tagpamaba sa Negros Occidental Provincial Police Office (NOCPPO) nga may-ara sila sang OPLAN SIGNAL sa pagmonitor sa mga man-made kag natural disasters kaangay sang bagyo.
Suno kay P/Lt Judesses Catalogo, ang kabug-usan nga Philippine National Police (PNP) ang nagagamit sang system kag may-ara sila sang focal person nga ginatrain para sa template monitoring sang mga man-made kag natural disasters.
Kaangay lamang sang pagdeklarar sang bagyo, kun sa diin ang mga focal person ang nagapadala sang communication sa ila nga group chat sa Police Community Relations (PCR) sang police unite.
Suno diri, kada tatlo ka oras may ara sang ginapatigayon nga monitoring kun may-ara na sang mga lugar nga ginbaha, indi malabayan ukon wala sang kuryente.
Sa situational report sang mga ini kada tatlo ka oras, gina-update man ang system sa idalum sang operation section sang PNP nga nakakonekta sa National kag Provincial Disaster Risk Reduction and Management Offices (DRRMOs).
Pinaagi sa syncronized information, sarang mapalab-ot ang mga impormasyon, kaangay na lamang sa epekto sang bagyo Karding kun sa diin may 15 ka pamilya ukon 64 ka indibidwal sa banwa sang Cauayan ang natumod nga nag-evacaute.
Bangod sini mangin mahapos ang pag-interpret sang data para sa gilayon nga pagbuhat sang tikang ukon pagpalab-ot sang bulig.
Kasunod sang evacuation sa Cauayan bangod sa pagbaha, ginpahayag ni Catalogo nga gilayon man nga ginpahibalo sang NOCPPO ang Provincial kag Regional Disaster Risk Reduction and Management Office (DRRMO).
Ini agud nga ang data ang mapalab-ot man sang Regional sa National office.
