BACOLOD CITY – Ginhatagan sang posthumous awards ni Presidente Rodrigo Duterte ang apat ka mga pulis nga ginpatay sang ginapatihan New People’s Army (NPA) sa Ayungon, Negros Oriental.
Impunto alas-9:00 kagab-i sang nag-abot si Presidente Duterte sa multi-purpose hall sang Negros Oriental Police Provincial Office (NOPPO) sa banwa sang Sibulan kun sa diin nahaya ang bangkay nanday Police Corporal Relebert Beronio, Patrolman Raffy Callao, Patrolman Roel Cabellon, kag Patrolman Marquino de Leon.
Diri iya ginhatag sa nagtaliwan nga mga pulis ang Order of Lapu-lapu Rank of kalasag medal kadungan sang iya personal nga pagpalab-ot sang pagpakig-unong sa pamilya sang mga ini.
Matapos ang madasig nga pagpakig-istorya sa himata sang mga pulis, gilayon man nga nagbiya ang presidente apang nagbilin ini sang cash assistance, cellphone kag scholarships para sa may mga kabataan na nga mga biktima kag pasalig nga trabaho sa iban pa nga himata sang mga ini.
Samtang si Chief PNP Oscar Albayalde nga nauna nga nag-abot sangsa presidente ang naghatag man sang posthumous medal of valor sa apat.
Upod man sa presidente nga nagbisita sanday Senator Bong Go, Department of the Interior and Local Government (DILG) Secretary Eduardo Año kag Department of Education Secretary Leonor Briones.
Samtang sa interview sa iloy ni Patrolman Callao nga si Juditha, masakit para sa ila ang natabo apang wala na sila sang mahimo kundi batunon na lamang ini kag nagapasalamat sila nga naghatag sang bulig ang presidente.
Nagakalipay naman ang stepfather ni Callao nga si Ruben Aquino nga bisan malayo, nagbisita gid si Presidente Duterte sa haya sang apat.
Nahibaluan alas-4:00 sang hapon kuntani ginapaabot ang chief executive apang alas-9:00 sang gab-i na ini nag-abot.
