Nakuha sang New York Knicks ang kampeonato matapos malutos ang San Antonio Spurs sa Game 5 sang NBA Finals sa score nga 94-90.
Ini ang una nga kahigayunan sa masobra 50 ka tuig nga nakuha sang Knicks ang championship sa NBA.
Ginpangunahan ni Jalen Brunson ang kadalag-an sang Knicks matapos makakuha sang 45 points sa Game 5.
Ini ang highest single-game Finals scoring performance sa history sang Knicks kag ginkilala bilang NBA Finals MVP.
Samtang, naghimo sang maragtas si Jordan Clarkson bilang labing-una nga Filipino-American player nga nakadaog sang NBA Championship.
Paagi sa 94-90 nga score, gintapos sang Knicks hampang kag nakuha ang serye nga 4-1, batok sa Spurs.
Sa interview sang Bombo Radyo kay Sports Analyst Monico Puentevella, ginpahayag sini nga kulang ang eksperyensya sang coach sang Spurs nga si Mitch Johnson.
Na-anugunan ini bangud masami nga ginabangko si Dylan Robert Harper rason nga gakadula ang puntos sang Spurs.
Dugang pa sini nga mahimo nga islan ang coach sang Spurs sa masunod nga NBA season.
Nalipay man siya nga nagdaog ang Knicks bangud may ara sang filipino player nga si Clarkson nga nangin bugal sa Pilipinas kag madamo man sang mga fans nga nagasinggitan para sa Knicks. Samtang, tuman ang kalipay sang isa ka Pilipino nga nakabase sa New York sa pagdaog sang New York Knicks batok sa San Antonio Spurs sa NBA Finals sa score nga 94-90.
Sa interview sang Bombo Radyo kay Ludovico Baqueriza III, Bombo International Correspondent derekta sa New York, masobra isa ka dekada na ini nga nagatinir didto kag iya ginakalipay nga matapos ang 50 katuig liwat na naman nga nakatapak sa Finals ang Knicks.
Suno diri, sang tuig 1999 nakasulod sa finals ang team apang nalutos batok sa San Antonio Spurs apang sa karun ang Knicks naman ang nagdaog batok sa Spurs.
Suno kay Baqueriza, tuman ka sadya sang selebrasyon sa New York sa pagdaog sang team kun sa diin naghinguyaw ang mga tawo nga nagatililipon sa mga bars, dalanon, coffe shops kag iban pa nga viewing area.
Pahayag sini napakita sang Knicks kag Spurs nga deserve nila nga mangin champion apang sa karun nga NBA, ginhatag sa Knicks ang tion para magdaog….Wala na sang may mahimo pa ang isa ka fan sang San Antonio Spurs kundi batonon nga napierde ang iya ginasuportahan nga team.
Sa interview sang Bombo Radyo kay Mernald Lopez, nagpusta ini sa Spurs halin sa Game 1 tubtob Game 5.
Suno diri, nasuboan ini nga makita nga napierde ang iya idolo nga si Victor Wembanyama bangod nagpati pa ini nga makabawi pa ang Spurs bangod home court ang ila ginhampangan apang nakita man sini kun ano ka sagad si Jalen Brunson sa game.
Suno kay Lopez, bisan nga may trabaho pa ini, wala untat ang iya pagtutok sa hampang sa NBA.
Pahayag sini, sa sunod nga NBA, ang Los Angeles Lakers naman ang luyag niya nga makita sa finals apang sa karun matapos ang kapierdehan, ginalantaw sini nga posible siya kag ang iban pa nga kaangay niya nga napierde sa pusta, ang magasud-an karun sang delata nga sardinas.
