Nagpahanumdom ang Negros Island Region Anti Cybercrime Unit nga maghalong sa love scam subong nga love month.
Sa interview sang Bombo Radyo kay Patrolman Jorge Perocho, Jr, chief clerk sang Regional Anti Cybercrime Unit, sa love scam masami nagapakilala ang isa ka persona bilang foreigner ukon Overseas Filipino Worker sa online platform apang wala sila nagapa-video call.
Suno diri, ang mga nagapang-modus nagapangayo sang ID, number kag One Time Password kun sa diin kalabanan sa mga ginatargert ang mga tigulang, single, may edad na kag ang mga balo.
Abiso ni Perocho, indi magsalig gilayon sa mga tawo nga nakilala lang online, indi magpadala sang sensitibo nga litrato ukon video, indi maghatag sang personal nga impormasyon kag likawan nga magpadala sang kwarta sa mga tawo nga indi pa kilala kag indi magpost sa online platform sang mga impormasyon nga mahimo magamit sang iban.
Suno kay Perocho, sang 2025 may natabo nga may nabiktima sang love scam kun sa diin nagdangat sa P300,000 ang kwarta nga nakawat.
Kun nakuha na sang scammer ang kwarta mabudlay na ini nga lagson apang sa Warrant to Disclose Computer Data (WDCD) mahimo pa makilal-an ang scammer kun makuha ang data privacy.
