Nagtakop na kaina sang hapon ang Negros Island Region Athletics Association Meet 2026 kasunod sang ginpatigayon nga closing ceremony.
Sa interview sang Bombo Radyo Bacolod kay Department of Education Negros Island Region Spokesperson Almyr Dequinia, may iban na nga nagpauli nga mga atleta matapos sang ila nga events.
Gin-require na lamang ang kada delegasyon nga magpabilin sang at least 50 ka mga delegado agud magtambong sa closing ceremony kalakip na ang mga nakabatun sang medalya.
Ang Closing Ceremony ang ginpatigayon gihapon sa Panaad Park and Stadium.
Diri man gindeklarar ang masunod nga mangin host sang NIRAA Meet sa 2027.
Suno diri, ang mga gold medalist ang automatic na nga magahampang sa Palarong Pambansa 2026 sa Agusan del Sur sa Mayo.
Apang ang mga silver medalist sa mga measurable sports ang mahimo gihapon nga makasulod sa Palarong Pambansa kun malab-ot nila ang qualifying standard.
Nagalaom ini sang best para sa mga atleta samtang ginpasalamatan man sini ang koordinasyon sang nanarisari nga ahensya kag local government units sa pagpatigayon sang madinalag-on nga labing una nga Regional Meet sa idalom sang bag-ong tukod nga Negros Island Region.
