BACOLOD CITY — Nagalaom ang number 5 sa Top 10 sang November 2017 Chemical Engineer Licensure Examination nga makita ang iya matuod nga amay ukon biological father sa palaabuton.
Si Jarjolen Jamora alyas Biboy sang Barangay Guinhalaran, ciudad sang Silay kag nakakuha sang 83.40 percent rating ang naga-edad sang 21-anyos apang wala pa sini nakit-an ang iya matuod nga amay.
Si Jamora ang nagdako sa luyo sang iya lolo kag lola kag ila man apelyido ang ginadala sini.
Sa Good Morning Philippines program sang Bombo Radyo Bacolod, ginpahayag ni Jamora nga 16-anyos pa lamang ang iya iloy sang nagbun-ag sa iya kag wala nagdugay ang relasyon nila sang iya kahagugma.
Nagtinir sa Metro Manila ang iya iloy kag nagpauli ini sang yara na siya sa elementarya.
Diri man natukiban ni Jamora nga iloy sini ang ginakilala niya nga utod kag lola kag lolo naman niya ang ginakilala nga amay kag iloy.
Ang mga grandparents ni Jamora ang nagatrabaho sa kampo sang tubo sa ciudad sang Silay nga amo ang ginakuhaan sang ginagasto sa iya pagtuon.
Suno kay Jamora, kilala niya ang iya amay sa pangalan kag nakit-an man sa litrato apang wala pa niya ini nakit-an sa personal.
Sa pihak sini, malapit man si Jamora sa mga ginikanan sang iya amay sa ciudad man sang Silay.
Sa karon, may lain na nga pamilya ang iloy ni Jamora kag may duha na ka mga kabataan.
Suno diri, bukas man siya nga makita sa ulihi ang iya amay.
Sa impormasyon nga nakuha sini, yara subong sa Cebu ang iya biological father.
