Subong nga Huwebes, mas naglala pa ang kondisyon sang panahon sa Extreme Northern Luzon bangod sa malapit nga distansya sang Super Typhoon Leon sa Batanes.
Ang sentro sang mata sang bagyo ang ulihi nga nasiplatan 100 km East Northeast sang Itbayat, Batanes.
Ini ang nagadala sang hangin nga nagadangat sa kabaskugon nga 195 km/h kag pagmadlos nga tubtob 240 km/h samtang nagahulag sa naaminhan-nakatungdan nga dereksyon sa kadasigon nga 20 kilometros kada oras.
Alas-5:00 subong nga aga, ginpaidalom na sa Tropical Cyclone Wind Signal no. 5 ang naaminhan kag nasidlangan nga bahin sang Batanes partikular na sa Itbayat kag Basco.
Samtang Signal No. 4 naman sa nabilin nga bahin sang Batanes.
Ginpaidalom naman sa Signal No. 3 ang naaminhan nga bahin sang Babuyan Islands.
Samtang Signal No. 2 sa nabilin nga bahin sang Babuyan Islands, mainland Cagayan, naaminhan nga bahin sang Isabela, Apayao, kag Ilocos Norte.
Signal No. 1 naman sa nabilin nga bahin sang Isabela, Quirino, northern kag central portions sang Nueva Vizcaya, Abra, Kalinga, Mountain Province, Ifugao, Benguet, Ilocos Sur, La Union kasubong man sa northern kag central portions sang Aurora.
Lauman ang mabulubagyuhon nga panahon sa Batanes, Cagayan kalakip na ang Babuyan Islands, Ilocos Norte, kag Apayao bangod sa Super Typhoon Leon.
Mangin maulanon man nga may kaupod nga mamadlos nga hangin sa Aurora, Ilocos Sur, La Union, nabilin nga bahin sang Cagayan Valley, kag nabilin nga bahin sang Cordillera Administrative Region bangod sa bagyo.
Mabatyagan man ang lapnagon nga pag-ulan sa Metro Manila, Western Visayas, Negros Island Region, kag nabilin nga bahin sang Luzon bangod sa Trough ukon ikog sang Super Typhoon Leon.
Samtang mangin makanay naman ang panahon sa Mindanao kag nabilin nga bahin sang Visayas, magluwas lamang sa gulpyada kag makadali nga pag-ulan tuga sang Localized Thunderstorms.
Ang Bagyo Leon ang ginalantaw nga magahulag sa naaminhan-nakatungdan sang kadagatan sang Extreme Northern Luzon antes maglandfall sa eastern coast sang Taiwan karun sa hapon.
Magamay naman ang tyansa nga maglandfall sa Batanes ang bagyo sa masunod nga duha ka oras, apang ini ang mangin tuman ka lapit kag yara na sa iya peak intensity.
Ginalantaw nga magahuyang man ang bagyo sa masunod nga 12 oras antes maglandfall sa Taiwan.
Matapos magtabok sa kadutaan sang Taiwan, ang bagyo ang magaliko sa northward tubtob north northeastward nga dereksyon, magalabay sa Taiwan Strait padulong sa East China Sea kag ginalantaw nga makagwa sa Philippine Area of Responsibility karun sa gab-i ukon bwas sa kaagahon, Nobyembre 1.
Wala naman ginadula ang posibilidad sang paglandfall sang bagyo sa mainland China.
