BACOLOD CITY — Suportado sang bilog nga ciudad sang Victorias ang newbie singer nga si Noven Belleza sa tunga-tunga sang akusasyon nga nanghimulos ini sang 19-anyos nga babayi sa ciudad sang Cebu sang tinalikdan nga adlaw.
Sa exclusive interview sang Bombo Radyo kay Victorias City Mayor Francis Frederick Palanca, ginpahayag sini nga challenge ukon pagpanghangkat lamang ini sa kabuhi ni Noven gani iya ginapasalig ang suporta sang mga opisyal kag mga pumuluyo sang ciudad.
Nagapati ang alkalde nga malayo sa personalidad sang 22-anyos nga singer ang akusasyon bangud mabuot ini kag mapainubuson, magluwas lamang kun nagdako ang ulo sini bangud sa kasikatan nga iya ginaangkon subong.
Apang sa personal nga paglantaw ni Palanca, wala man sang pagbag-o sa paminatasan ni Noven.
Masubo para sa opisyal ang nadangatan sang singer bangud maapektuhan sini ang iya career kag madamo sang naga-idolo sa iya, bata man ukon tigulang.
Nagaduda si Palanca sa kamatuoran sang akusasyon sang babayi bangud kun basehan ang balita, siya mismo ang nagkadto sa hulot ni Noven las 2:00 sang kaagahon, apang hulaton naman suno sa iya ang resulta sang imbestigasyon.
Pananglitan may sala ang Victoriahanon nga singer kag makita sang korte, ginpanugyanan ni Palanca si Noven nga atubangon niya ang amo nga kaso.
