BACOLOD CITY – Bilog nga gab-i nga wala nakatulog ang pamilya sang newbie singer nga si Noven Belleza sa Negros Occidental matapos nahibaluan nga nagapangatubang ini sang kaso nga rape sa Cebu City kahapon.
Sa pagbisita sang Bombo Radyo sa balay nanday Belleza sa Hacienda Salome Dos, Barangay 10, Victorias City, emosyonal ang amay sini nga si Reynaldo samtang gina-interview.
Suno kay Reynaldo, indi sila makapati sang nagtawag kahapon ang utod ni Noven kag ginbalita nga may kaso ang singer kag naka-hospital arrest sa karun sa ciudad sang Cebu.
Dako suno sa iya ang ila nga pagkabalaka sa nadangatan ni Noven bangud kun basehan ang pagkakilala sini sa 22-anyos nga anak, indi kumbinsido ang amay nga mahimo ini sang iya kamagulangan amo gani nga wala sila nakatulog kagab-i.
Sa karun, nagahulat pa sila sa advise ni Noven kun magapadulong sa Cebu kadungan sang pagpangamuyo sa Diyos nga masarangan sang anak ang isyu nga iya ginaatubang.
Nagapati man ang amay nga intriga lamang ang rape issue bangud suno sa iya, indi masarangan ni Noven nga sa isa lang ka pisok, gub-on sini ang iya ginpangabudlayan tubtub nga nalampuwasan kag nangin kampeon sa reality singing contest.
Malabo suno kay Reynaldo nga mahimo ini ni Noven bangud may kaupod siya nga manager sa ginatiniran nga condominium kag may mga gwardiya man ang building.
Suno diri, wala naga-inom ukon anuman nga bisyo ang iya anak kag kilala man ini sa bilog nga Victorias City nga matinlo ang rekord.
Ang 22-anyos nga newbie singer ang subang sa walo ka mag-ulutod kag nagatrabaho sang una sa plantasyon sang tubo antes nagsabak sa reality singing contest.
