Ginpasalamatan sang Office of the Civil Defense – Negros Island Region ang tanan nga pumuluyo nga nagkooperar sa pagpatuman sang preemptive evacuation sa paglabay sang Bagyo BASYANG nga nagdowngrade na sa Low Pressure Area.
Sa interview sang Bombo Radyo Bacolod kay OCD-NIR Director Donato Sermeno III, 1,843 ka pamilya ang nag-evacuate gikan sa 29 ka mga Barangay sa Negros Island Region.
Samtang may-ara naman sang 33 ka evacuation centers.
Ginapakamaayo sini nga wala sang nareport nga napatay, nasamaran kag namissing sang maglabay ang bagyo.
Wala man sang nareport nga pagbaha, kag wala man sang narecord nga naguba nga mga dalan kag taytay, kag wala man sang landslide.
Nagresume naman ang byahe sang mga barko kasubong man sang mga flights.
Ginalantaw ni Sermeno nga indi tuman ang epekto sang Bagyo sa NIR bangod naghuyang na sa Tropical Depression sang ini ang maglabay.
Pahanumdom sini sa mga pumuluyo nga magsunod sa kaangay nga mga panugyan sang preemptive evacuation, bangod sa masami ang mga nagapangayo sang rescue amo ang mga wala nagpati sang ginpanawagan ang evacuation.
