Nagapabilin sa red alert status ang Office of the Civil Defense (OCD) Region 6 bangud sa Bagyo Auring.
Sa interview sang Bombo Radyo Bacolod kay Ma. Aletha Nogra, pinuno sang Disaster Risk Reduction and Management Division sang Office of the Civil Defense Region 6, ginpahayag sini nga 24/7 ang ila nga monitoring sa karon kun sa diin tanan nga personnel ang on standby.
May mga augmented personnel man sila nagikan sa Armed Forces of the Philippines kag Philippine National Police.
As of 9pm kagab-i, kabug-usan nga 115 ka mga pamilya ukon 442 ka mga indibidwal ang ila narekord nga nag-evacuate sa Western Visayas.
Ini ang ginalakipan sang Balasan, Aklan, Roxas City kag Pilar, Capiz.
Suno kay Nogra, antes pa man nag-abot sa area of responsibility ang Bagyo Auring, mas ginpakamaayo nalang sang mga residente sa nasambit nga mga lugar nga mag-evacuate.
Suno sa iya, posible nga nagmanton na ang mga pumuluyo sa ila na-eksperyensyahan sang una.Liwat naman ini nga nagpahanumdom sa mga Local DRRMC subong man sa mga pumuluyo nga padayon nga magmonitor kag mangin mabinantayon sa lakat sang panahon.
