Nasorpresa ang konsehal sa ciudad sang Bacolod sa nangin official statement ni Bacolod City Lone District Representative Alfredo “Albee” Benitez may kaangtanan sa issue sa DBP Loan.
Sa interview sang Bombo Radyo Bacolod kay Councilor Homer Bais, nakibot siya sa nangin pahayag ni Benitez nga malayo sa patag kag kulang sa factual basis.
Suno kay Bais, dapat ang kongresista ang indi na manghilabot sang trabaho sang City Council ilabi na sa pagpangayo sang comprehensive report gikan sa tatlo ka komitiba nga ginalakipan sang Committee on Appropriations and Finance; Committee on Laws; kag Committee on Government Assets.
Suno sa konsehal, wala man sang kamatuoran ang ginapahayag sang kongresista nga nagasulit sulit ini sa pag-criticize sa iya bangud wala gid ini makamensyonar bisan diin nga may kaangtanan sa DBP loan.
Suno diri sang Miyerkules lamang ini nakamensyonar bangud kinahanglan na nila ang committee report bangud magadiskusyon na sila sang budget para sa madason nga tuig.
Dugang pa sini nga sa paglantaw niya nga nag-init ang ulo ni Congressman Albee Benitez kag naglab-ot sa hampakanay lamesa sang ginhambalan niya ini nga pamatian siya kag indi lang ang mga estorya nga ginaduhol sa iya sang mga nagapasip-sip sa iya.
Nagpanindugan ini nagsugod lamang siya sa pagpamangkot bangud naintriga siya sa resolution ni Councilor Em L. Ang.
Suno kay Bais, kun ginapangayuan sang report ang Masskara Coliseum nga wala pa matapos dapat tanan nalang nga proyekto sa ciudad nga ginpondohan gamit ang loans ang pangayuan agud patas.
Ginpahayag man sini nga wala ini nag-grand standing bangud sang Miyerkules lamang ini nagpamangkot kag never niya ini ginhimo antes ang Wednesday.
Suno sa konsehal indi sini luyag nga talikdan ang mga pumuluyo nga nagbutang sa iya sa pwesto gani bisan madamo ang naga-criticize sa iya sa karun, ginahimo sini ang dapat nga himuon.
Wala man ini mahadlok kun kuhaan siya sang Committee sa Sangguniang Panlungsod bangud sa natabo kag magapasalamat pa ini bangud nga mas makatrabaho pagid ini sang insakto.
