BACOLOD CITY — Indi makatambong sa graduation rites sang Philippine National Police Academy ang iloy sang valedictorian sang Class 2018 nga si Police Cadet Fritz John Vallador.
Sa exclusive interview sang Bombo Radyo Bacolod, ginakasubo ni Ana Maria Vallador sang Purok Magbinuligay, Barangay Bata, Bacolod City nga indi siya makapauli agud magtambong sa graduation rites sa Marso 21.
Ang iloy nga Vallador ang nagatrabaho bilang domestic helper sa Marbella, Spain.
Suno diri, indi siya pagpasugtan sang iya amo nga magpauli sa Pilipinas bangud kinahanglan sini nga tapuson ang iya kontrata.
Aminado ang iloy nga naghingyo gid ang police cadet nga matambong ini apang iya ginakasubo nga indi makaintindi ang iya amo sa kaangay sini nga tradisyon sang mga Pilipino.
Sang tinalikdan nga adlaw, nag-istoryahanay ang mag-iloy kag ginbalita sang police cadet nga siya ang valedictorian.
Sa karon, daw kaangay nga yara gihapon sa cloud nine ang OFW bangud sa nadangatan sang iya anak.
Sang nagalantaw si Ana Maria sa press conference sa Kampo Krame kahapon, nagatulo ang luha sini samtang nagaatubang sa madamo nga reporters ang police cadet.
Suno diri, bugal para sa isa ka iloy ang anak nga kaangay sang PNPA valedictorian.
