Tuman ang pagpasalamat sang isa ka Filipina nga safe ini sagihapon matapos nga mastranded sa isa ka waiting shed sa Israel matapos nga magpalupad sang rocket ang Iran kahapon, Marso 2, 2026.
Sa interview sang Bombo Radyo Bacolod kay Lina Diamante, nagwa ini apang natimingan nga nagabantay ini sang bus kag wala sang mga pamalay malapit sa waiting shed kun sa diin ini nagahulat sang naghuni ang siren nga nagapahayag nga may yara sang naglupad nga rocket.
Bangud wala sang pamalay wala sang bomb shelter gani nagpanago lamang ini sa pader kag nakaluy-an wala man ini maigo kag malayo man sa lugar kun sa diin ini ang gintup-an sang debris sang rocket.
Samtang sa pihak nga bahin, indi man sini personal nga nakilala si Mary Ann De Vera ang OFW nga napatay matapos nga ginproteksyunan sini ang iya nga ginabantayan gikan sa pagtupa sang debris sang missiles.
Suno kay Diamante si Devera ang nagpadulong sa Israel sang 2019 kaupod ang bana sini.
Maswerte lang nga wala nag-upod ang bana ni De Vera sa iya pagbalik sa trabaho gani wala ini napatay bangud masami nga nagaupod ang bana sa iya asawa sa pagbalik sa trabaho matapos ang day off.
Aminado man si Diamante nga nakulbaan na ini subong indi kaangay sang una.
Apang suno kay Diamante kun imo na nga tion nga mapatay bisan diin ka pa manago may bomb shelter man ukon wala, mapatay ka man sagihapon.
Gani siya ang nagapangamuyo nalang ilabi na nga ang iya nga ginatiniran nga flat ang wala sang bomb shelter.
