Gin-athag sang officer-in-charge sang Securities and Exchange Commission (SEC)-Bacolod City nga sarang makapangayo sang certification ukon verification ang isa ka partido kun nakarehistro sa amo nga talatapan ang amo nga korporasyon ukon partnership.
Sa interview sang Bombo Radyo Bacolod kay Atty. Annabelle Coral Respal, OIC sang SEC-Bacolod City, ginpahayag sini nga depende sa end user sang nagrequest sang certification kun sa diin niya ini ipresentar.
Suno sa iya, bisan sini nga requesting party ang sarang makapangayo sang certification.
Kun ila makita sa ila nga data base ang pangalan sang amo nga korporasyon, maga-issue sila gilayon sang certification nga nagapamatuod nga rehistrado ini sa SEC.
Pananglitan naman nga indi nila makita ang ngalan, negative certification naman ang ila ginahatag sa requesting party.
Ini ang kaangay lamang sa isyu angot sa Victorias Milling Company Distillery Plant sa Barangay Purisima, Manapla kun sa diin ginapahayag sang pila ka mga residente nga indi rehistrado sa SEC ang Manapla Distillery Plant.
Apang gin-athag sang damlag lang ni Manapla Mayor Manuel Escalante nga ang ngalan sang distillery nga nakarehistro sa SEC amo ang VMC Distillery Plant kag indi Manapla Distillery Plant.
Suno kay Respal, basta nakarehistro lamang sa ila, maka-issue gid sila gilayon sang certification bangud nga ang SEC ang ginakabig registrar sang korporasyon kag partnership.
