Nagdangat sa P900,000 ang inisyal nga balor sang kahalitan nga gintuga sang sunog kaina sang aga sa Purok Amor, Barangay Villamonte sa syudad sang Bacolod.
Suno kay Fire Chief Inspector Rodel Legaspi, fire marshal sang Bacolod City Fire Station, naghalin ang kalayo sa balay ni Edwin Dela Cruz kun sa diin may yara sang sharer nga si Jethro Mosang apang nagapadayon ang ila nga follow-up investigation agud mahibaluan kun pila tanan ang yara sa balay bangud madamo ang nagarenta diri.
Suno kay Legaspi, santo sa ila pagpangusisa, nagdangat sa 11 ka balay ang totally damaged.
Suno sa fire marshal, ginatumod pa sa karun ang ginhalinan sang kalayo.
Wala man sang may nareport nga casualty bangud sa sunog.
Suno kay Legaspi, ginapasalamatan sini nga aga nagluntad ang sunog kag indi gab-i bangud nagainikit-ikit lamang ang mga pamalay sa lugar.
Nagpanugyan man ini sa mga pumuluyo nga siguruhon nga wala sang nakasaksak nga appliances ukon ano man nga bagay nga mangin tunaan sang sunog antes maghalin sa balay agud malikawan ang sunog.
Wala man nakahibalo ang tag-iya sang balay nga ginhalinan sang kalayo nga nagtuga sang sunog kaina sang aga sa Purok Amor, Barangay Villamonte sa syudad sang Bacolod.
Sa interview sang Bombo Radyo Bacolod kay Edwin Dela Cruz, nahibaluan lamang sini nga nasunog na ang balay bangud nagsinggitan si Judith Ramos, ang nagarenta sa ibabaw sang balay sini, nga nagapangayo sang bulig bangud may kalayo na sang ini ang nagsulod sa ila balay matapos magpataya sang Small Town Lottery (STL).
Suno kay Dela Cruz, may yara sang lima ka kwarto sa ibabaw kag lima man ka kwarto sa idalom nga ginaparentahan.
Suno diri, wala siya nakahibalo kun sa diin naghalin ang kalayo apang ginalantaw sini nga sa appliances kag wala naman ini nakapamangkot sa nagarenta sa ila.
Suno diri, ang iya balay ang human sa concrete kag light materials.
Nagaisahanon ini nga nagapangabuhi diri sa Bacolod bangud ang iya pamilya ang yara sa Manila.
Wala naman siya sang may mahimo bangud nagluntad na ang sunog sa ila balay.
Ginpahayag man ni Judith Ramos nga wala man ini nakahibalo kun sa diin naghalin ang kalayo bangud pagbukas sang bata sini sa ila kwarto sang nag-abot sa eskwelahan, gintawag na lamang siya kag gintudlo nga may nagaaso na sa ila kwarto.
Suno kay Ramos, wala siya nakasulod una sa kwarto bangud naghimos na ini sa ila kusina sang iya inasal nga ginabaligya.
Suno diri ginasiguro man sini nga wala na sang appliances nga nakasaksak antes maghalin sa balay.
Suno kay Ramos, indi man matumod kun sa diin naghalin ang kalayo bangud aso nalang ang nakita sini.
Madasig man ini nagpangayo sang bulig kun sa diin madamo man sang nagbasya sang tubig sa nagaaso nga kwarto.
Duha naman ka tuig sila nga nagapuyo sa balay nga ila ginarentahan.
Nagapanawagan man ini sang bulig bangud wala sila sang nasalbar nga gamit bangud natupok tanan.
