Opisyal nga ginbuksan ang 28th Panaad sa Negros Festival alas-4:00 subong nga hapon.
Sa speech ni Negros Occidental Governor Eugenio Jose “Bong” Lacson sa Thanks Giving Mass kaina alas-8:00 sang aga, ginalauman sini nga mag-enjoy ang mga Negrense kag guests sa mga aktibidad.
Yara man sa thanks giving mass si Vice Governor Jeffrey Ferrer, mga board members kag mga empleyado sang Negros Occidental Provincial Government.
Nagalaom ang gobernador nga wala sang magluntad nga mga insidente kag nagapati ini nga preparado na ang mga security personnels.
Nahibaluan nga nagpatigayon na sang send-off ceremony ang Negros Occidental Police Provincial Office, kasubong man ang iban pa nga mga magabantay sa seguridad kaangay sa mga personnel sang Bureau of Fire Protection, Philippine Coast Guard, Bacolod City Police Office, Bacolod Traffic Authority Office kag mga Forced Multiplier.
Gin-athag man sini nga nagkumpirmar na si Senator Imee Marcos bilang dinapit nga bisita sa opening.
Ang mayor nga purpose sang Senadora amo ang paghatag sang land titles kag support services sa mga Agrarian Reform Beneficiaries.
Madamo man sang mga nakalatag nga programa ang probinsya para sa isa ka semana nga kapiestahan, kalakip na ang Festival Dance Competition, nga natunga sa City kag Municipal level kag ang magadaog ang makabaton sang P100,000.
Yara man ang Lin-Ay sa Negros kag ang nanarisari nga mga produkto sang kada local government units (LGUs) nga makita sa paglibot sa mga kiosk sang kada banwa kag ciudad sa Panaad Park and Stadium.
