Nangin madinalag-on ang assessment sa una nga adlaw sang pagsaulog sang Bacolod Chicken Inasal Festival 2024.
Sa interview sang Bombo Radyo Bacolod kay Police Lt. Col. Ronnie Brillo, commander sang Bacolod City Mobile Force Company, wala sang reported nga insidente halin sa aga tubtob maggab-i.
Isa lamang sa nakita nila nga problema amo ang pagsulay sang mga nakadeploy nga kapulisan.
Bangod sini sila ang magatukod sang canopy nga maplastar sang mga Police personnel agud indi na sila kinahanglan magbiya pa sa ila area of responsibility kun magbubo ang ulan.
Kahapon sila ang nagdeploy sang 433 personnel nga gintululunga sa tatlo ka festival sites nga ginalakipan sang Upper East Megaworld, North Capitol Road, kag Manokan Country.
Magluwas sa kapulisan may nag-augment man nga mga volunteers kag forced multipliers.
Panawagan ni Brillo sa mga pumuluyo nga padayun nga magkooperar sa nabilin pa nga adlaw sang kapiestahan kaangay sa una nga adlaw kun sa diin wala sang narecord nga insidente.
Sa pihak nga bahin temprano naman nga nagtahaw ang tawo sa Upper East Megaworld kahapon.
Sa interview sang Bombo Radyo Bacolod kay Police Captain Glenn Montaño, officer in charge sang Bacolod Police Station 2, madamo ang mga tawo nga naglagaw apang napabilin man ang katawhayan sa lugar.
Alas-12:00 sang tungang gab-i pa lamang gamay nalang ang nabilin nga mga tawo bangod sa pag-ulan ulan, kag alas-2:00 kaina sang kaagahon, nagpull-out na ang mga nakadeploy nga kapulisan bangod wala na sang tawo.
Abiso ni Montaño sa mga magalagaw nga indi magdala sang mga malahalon nga pagkabutang kasubong man dalagko nga backpack agud mangin matawhay ang paglagaw.
