Suspendido ang operasyon sang Transcom Bacolod sa sulod sang 48 ka oras humalin kagab-i kag magaresume sa Huwebes bangud sa patigayunon sang sanitization kag disinfection matapos nga nagpositibo sa COVID-19 ang 41 ka mga empleyado.
Sa interview sang Bombo Radyo kay Atty. Joselito Bayatan, City Legal Officer sang Bacolod, ginpahayag sini nga kahapon, ginserbehan ang BPO company sang notice of suspension and cooperation kag ginsuspendi ang ila operasyon sa sulod sang 48 oras agud makapatigayon sang disinfection.
Suno kay Bayatan, nagsulat naman sila sa Department of Labor and Employment kag magapatigayon sila sang joint investigation tuhoy sa pagpatuman sang health protocols sa nasambit nga kumpaniya.
Suno diri, nahibaluan nga apisar nga nagparehistro ang Transcom sa BACTRAC system, wala nila ini gina-implementar.
Suno sa iya, mas maayo kuntani kun nagagamit sila sang BACTRAC agud mas mangin mahapos ang contact tracing.
Gindugang man sini nga dapat hatagan pagtamod sang ulubrahan ang ginabatyag sang mga empleyado kaangay na lamang kun nagalain ang ila pamatyag apang nagasige pa gihapon report sa trabaho.
Sa karun, suno sa city legal officer, nagakoordinar sila sa Emergency Operations Center kag nakapatigayon naman sang preliminary talk kaupod ang Transcom tuhoy sa status sang mga empleyado nga nagpositibo.
Apang gin-athag sini nga ang may gahom nga magmonitor kag mag-impose sang disiplina kag pagsulundan sa mga ulubrahan amu ang DOLE gani kun ano ang mangin outcome sang imbestigasyon sang ahensya, ila ina irespeto.
