Ginkumpirmar ni Bacolod City Administrator Em Ang nga nagpahibalo ang pamunuan sang Transcom Bacolod sa Emergency Operations Center nga may plano ang ila executive sa head office sa Manila nga makigsapol sa EOC sa Huwebes.
Sa interview sang Bombo Radyo kay Ang, ginpahayag sini nga nagnotify pa lang ang BPO company apang wala pa ini maset formally bangud nagapangita pa sila sang flight.
Suno diri, luyag man sang ila mga executive nga makit-an kag mahibaluan kun ano ang compliance sang ila office sa Bacolod.
Sang Lunes, suno sa iya, nakapatigayon naman ang EOC sang virtual meeting kag teleconference kaupod ang BPO company kag magabalik ang ila operasyon sa Huwebes mataposa ng 48 hours suspension bangud sa disinfection.
Suno kay Ang, ang City Legal Office na ang bahala nga magtake action sa nasambit nga kumpaniya bangud ginhatagan na sila sang report kag enforcement.
Suno sa city administrator, nagsulat man ang EOC sa tanan nga mga BPO companies sa ciudad kahapon agud magpahanumdum sang mga work protocols.
Nagapadayon naman ang inspection kag monitoring sang EOC sa iban pa gid nga mga BPO companies kag gin-athag ni Dr. Chris Sorongon, deputy for medical services sang EOC, nga indi lang ini tungod sa nagluntad sa Transcom kundi regular na nila ini nga ginahimo sumugod sang nagsurge ang COVID cases sang Agosto 2020.
Suno kay Sorongon, nagapadayon ang ila komunikasyon kag pagpahanumdum sa mga BPO companies sa ciudad.
Ginakabig man sini nga “wake-up call” ang natabo sa Transcom kag nagpanugyan indi lang sa mga BPO companies kundi sa tanan nga establishmento nga indi magkumpiyansa kag hugot nga ipatuman ang mga health protocols.
