Gin-amend ni Bacolod City Councilor Simplicia Distrito ang ordinansa nga gin-author sang anak sini nga si anay Councilor Ceasar Distrito tuhoy sa paghatag sang incentives sa mga honor students.
Suno kay Councilor Simple, gin-ammend sini ang ordinansa nga nagahatag sang incentives sa Top 10 honor students sa ciudad bangud suno sa iya, limitado lamang ang napulo nga numero sadto apang sa karun kadamo na sang mga honor students.
Suno sa iya, malakip sa mga makabaton sang award, medal, certificate kag cash incentive ang mga may average nga 90 pasaka.
Wala naman sini ginspecify kun pila ang exact nga balor sang cash incentives nga igahatag bangud ini ang magadepende sa local school board kag sa budget officer.
Suno diri,sa karun maskin ano nga section, public kag private schools, humalin elementary tubtob senior high school ang sarang nga makabaton sang recognition nagikan sa ciudad.
Makabig nga highest honor ang may average nga 98 tubtob 100; with high honor naman ang may 95 tubtob 97 nga average; kag with honors ang may average nga 90 tubtob 94.
Suno kay Distrito, tinutuyo sang ordinansa nga ma-encourage ang mga estudyante nga magtuon sang maayo para sa ila kaayuhan.
