Tatlo ka semana antes ang pag-umpisa sang Paris Olympics, ang mga organizers ang nagdihon na sang contingency plans samtang nagapabilin ang mga palamangkutanon may kaangtanan sa safety sang Seine River nga natalana patigayunan sang open-water swimming events sa tion sang Summer Games.
Ang pinakaulihi nga testing results nga ginpagwa sang monitoring group nga Eau de Paris ang naghatag sang paglaom matapos nga makita nga ang water pollution levels sa nasambit nga suba ang nag-improve sa nakaligad nga semana.
Nakita sa data nga ginpagwa sang ciudad sang Paris nga ang concentrations sang E.coli kag enterococci bacteria ang manubo sa legal threshold nga 6 out of 9 days sa tunga sang June 24 tubtob July 2.
Sa pihak sang improvement sa status sang tubig sa Seine River may yara sang Plan B ang Olympics Committee para sa water sports agud nga malikawan ang risgo sa ikaayong lawas sang mga atleta.
Natalana ang Marathon swimming events sa humalin sa August 8 tubtob 9 kag ang triathlon ang patigayunon sa July 30, July 31 kag August 5 kag ang mga ini ang patigayunon sa nasambit nga suba.
Suno sa mga organizers, ginalantaw pa nila ang pila ka mga option kaangay sang lain nga venue para sa marathon swimming kag kakason nalang ang swimming leg para sa triathlon.
Mahimo man nga ipostpone sang pila kaadlaw ang pagpatigayon sang triathlon.
Samtang ang marathon swimming competition ang mahimo man nga sayluhon sa Vaires-sur-Marne Nautical Stadium.
Sa karun, indi lang ang bacteria sa tubig sang Seine River ang ginalantaw nga problema kundi kalakip na ang hinali nga pagbubo sang ulan kag makapasaka sang bacteria levels sa nasambit nga suba.
