Mga Empleyado sang Vallacar Transit Inc. nga nagtambong sa pamulong-pulong sang kampo ni Leo Rey Yanson nga amo ang ginkakas bilang presidente sang kompanya.
Nagapabilin ang suporta sang mga empleyado sang Vallacar Transit Incorporated sa presidente sang Yanson Group of Bus Companies nga ginpahalin sang iya 4 ka mga utod.
Pila ka mga lideres sang labor unions sang bus transportation group sa syudad sang Bacolod ang nag-pakita sang ila suporta kay Leo Rey Yanson (LRY) nga amo ang gin-pakakas bilang presidente kag sa ila iloy nga si Olivia Villaflores Yanson (OVY) nga ginkuhaan man sang iya 4 ka mga bata sang otoridad sa nasambit nga kompanya.
Leo Rey Yanson sa mga utod: Kuntani bisitahon niyo man si mommy
Ginakilala sa gihapon sang Philippine Agricultural, Commercial and Industrial Workers Union (PACIWU)- Trade Union Congress of the Philippines kag PACIWU-Vallacar Transit Incorporated (VTI) nga sanday LRY kag OVY ang nag-pasanyog sa nasambit nga bus firms.
Bangud sini, tuman ang pag-pasalamat ni Leo Rey sa tanan nga mga empleyado nga naga-suporta sa ila nga mag-iloy.
Gina-hingyo man sini sa tanan nga mga empleyado nga indi mag-pakulba sa nagakatabo sa ila kompanya bangud mintras yara pa siya, iya gid ipakigbato kag apinan ang kinamatarong sang mga empleyado sang Yanson Group of Bus Companies.
Nahibaluan nga tuig 2007 sang gintalana sang mag-asawa nga founder sang kompanya nga sanday Ricardo Yanson Sr. nga nagtaliwan na sadtong tuig 2015 kag Olivia Yanson ang ila agot nga bata nga si Leo Rey bilang presidente sang kompanya apang gin-pakakas sang 4 sini ka mga utod nga sanday Roy Yanson nga amo karun ang nagbulos bilang bag-o nga presidente, Ma. Lourdes Celina Yanson-Lopez, Emily Yanson, kag Ricardo Yanson Jr.
