BACOLOD CITY – P15 milyones nga balor sang ginapatihan shabu ang narekober sang mga kapulisan sa Bacolod City Police Station 2 sa ginpatigayon nga buy-bust operation sa Purok Bangrus, Barangay 1, ciudad sang Bacolod, kagab-i.
Isa ka kilo sang shabu ang nakuha sang mga pulis sa balay sang subject nga si Reynante Villanueva nga nakapalagyo kasunod sang operasyon.
Suno kay Police Chief Inspector Benedicto Villarias, commander sang Station 2, wala gid nila ginlauman nga amo sini kadako nga iligal nga druga ang ila makuha sa amo nga balay.
Una diri, nagbakal ang poseur buyer sang Station 2 sang balor isa ka libo ka pesos nga shabu kag sang nagpositibo, gilayon nila nga ginsulod ang balay.
Namutikan ini ni Villanueva kag siya ang nagpalupok sang armas luthang kag nagdalagan amo gani nga wala nadakpan sang mga kapulisan.
Sa pihak sini, nadakpan naman sang kapulisan ang asawa sini nga Jolie Villanueva kag ang natabuan nga yara sa ila balay nga si John Deocampo sang Purok Sawmill, Barangay Bata, ciudad sang Bacolod.
Ang isa ka kilo sang shabu ang nasulod sa isa ka dako nga plastic.
Magluwas diri, narekober man sang kapulisan ang lima ka elongated sachet sang ginapatihan shabu kag buybust money nga isa ka libo ka pesos.
