Ginbalik na sang Punong Barangay sa Brgy Tabunan, Bago City, ang P20,000 nga Presidential Scholarship grant nga nabatun sang iya bata.
Madumduman nga madasig naglapta sa social media kag gin-ulan sang batikos si Punong Barangay Maria May Suarez, matapos niya ginpasulod sa lima ka makabatun sang P20,000 ang iya nga bata.
Apisar nga wala sa criteria sa pagpili nga ginadumilian ang paglakip sang mga himata sang opisyales sang Barangay, lakip sa prayoridad ang mga graduating college students nga yara sa risgo nga madrop-out bangod sa kahimtangan pinansyal, kag wala pa sang miyembro sang pamilya nga nakagradwar sa kolehiyo.
Sa interview sang Bombo Radyo Bacolod kay Liga ng Barangay – Negros Occidental Chapter President Julius Sablan, gincall niya ang atensyon ni Suarez tuhoy sa issue sang Agosto 12, kag sang Agosto 13, ini ang naghimo na sang letter para sa cancellation.
Ang P20,000 cash ang ginsurrender mismo ni Suarez sa iya subong nga adlaw.
Ginklaro man sini nga Pebrero palang ginpalab-ot na sa ila ang natuhoy sa programa, apang wala sang may nagsapak bangod madamo ang wala nagapati nga ini ang mapatuman.
Nakumpirmar lamang nila ang programa sang nagpagwa na sang guidelines, gani late na ang kadam-an nakapili sang estudyante nga ilakip sa makabatun.
Samtang kun makapili na sang bag-o nga magabatun sang P20,000 ang pangalan ang ipadala pa kay Executive Secretary Ralph Recto para sa approval, antes mahatag sa estudyante nga magradwar sa masunod nga tuig.
Ini ang magalabay pa sa nasambit nga proseso bangod ang pondo ang nagikan mismo sa Office of the President.
Ginapasalamat naman ni Sablan, nga matapos ang issue, gilayon nga nagcontact sa iya si Suarez kag personal nga nagtugyan nga i-uli ang kwarta. Samtang,wala na nagpakita sa Barangay Hall sang Brgy Tabunan, Bago City si Punong Barangay Maria May Suarez matapos maglupok ang issue sa paglakip sang iya bata sa listahan sang makabatun sang P20,000 nga Presidential Scholarship grant.
Sa interview sang Bombo Radyo Bacolod kay Barangay Kagawad Tomas Lobaton Makilan, sang Brgy Tabunan, ulihi sini nga nakita si Suarez sa Brgy Hall sang Lunes, nakaligad nga semana.
Apang nagtugon ini sa Barangay Secretary nga kun may magapangita sa iya tuhoy sa issue, ang lab-uton na lamang amo si Bago City Association of Barangay Captain President Jovito Gahaton.
Ang ulihi lamang nga nahibaluan ni Makilan nga nagpasalig si Suarez nga ibalik ang P20,000.
Samtang ginklaro man sini nga wala gid mapalab-ot sa mga opisyales sang Barangay ang natuhoy sa guidelines, samtang wala man sang may ginpatawag nga meeting para sa pagpili sang mga beneficiaries.
