Kapin P238, 000 nga balor sang suspected shabu ang nakuha sa isa ka Street Level Individual (SLI) kasunod sang ginpatigayon nga drug buybust operation Barangay 4 sa ciudad sang Bacolod kagab-i.
Ginkilala ang subject person kay alias Rudyerd, 45-anyos, kag residente sa nasambit nga lugar.
Narecover diri ang 35 grams sang suspected shabu.
Sa interview sang Bombo Radyo Bacolod kay Police Major Eugene Tolentino, station commander sang Bacolod Police Station 2, madugay naman sang mga ini nga ginamonitor ang subject person antes pa man napatigayon ang buybust operation.
Suno kay Tolentino, makapila man ini ka beses nga ginattempt nga patigayunan sang buybust operation apang subong lang ini nga nadakpan.
Ginpahayag man nga ang iban nga upod sang subject person ang nadakpan na.
Dugang pa sang station commander nga bangud manug-umpisa na ang Masskara Festival sa bulan sang Oktubre, hugot nga ginabantayan sang mga otoridad ang transaksyon sa pagbaligya sang illegal nga druga.
Suno pa kay Tolentino, ginalantaw man nga sa mismo tion sang Masskara Festival magapatigayon sang transaksyon bangud masako na ang mga otoridad.
Nakahunong sa karun sa Bacolod Police Station 2 si alyas Rudyerd kag natalana magapangatubang sang kaso nga pagpalas sa Republic Act 9165 ukon Comprehensive Dangerous Drugs Act of 2002.
