Masobra P300, 000 nga balor sang suspected shabu ang nakumpiskar sang Bacolod City Police Station 2 sa ginpatigayon nga buybust operation kun sa diin apat ka mga persona ang arestado.
Pasado las-2:00 kahapon sang natigayon nga nadakpan kanday Joemarie Jun dela Cruz, 28 anyos sang Purok Tilapia, Barangay 3; live-in partner sini nga si Joyjoy Antiperda, 28 anyos; Kirby Dajil-Dajil 28 anyos kag residente sang Barangay Mandalagan; kag Antonieta Diopeta sang Purok Lubi, Barangay 3.
Sa interview sang Bombo Radyo Bacolod sa hepe sang Police Station 2 nga si Police Captain Leo Estopa, ginpahayag sini nga yara sa watchlist nila si dela Cruz, isa ka street level target kag shabu gid lang ang iya nga source of income.
Samtang, ginbuyagyag man sini kun sin-o ang iya nga distributor kag yara man ini sa monitoring list sang Police Station rason nga maga-patigayon ang mga otoridad sang follow-up operation.
Nakumpiskar sa paghinakop sang mga suspetsado ang 18 ka mga sachets sang shabu nga may kabug-aton nga 28 grams kag may DDB value nga P336,000.
Yara karun nakahunong sa kustodiya sang Police Station 2 ang nasambit nga mga suspetsado kag naga-pangatubang sa kaso nga Republic Act 9165 ukon Comprehensive Dangerous Drugs Act of 2002.
