BACOLOD CITY — Kwatro milyones pesos nga balor sang peke nga mga sigarilyo ang narekober sang mga otoridad sa isa ka lalaki nga taga-Mindanao nga nadakpan sa ciudad sang Bacolod, Huwebes sang udto.
Si Adam Mangoda nga ginapahayag lider sang Mangoda Group ang nadakpan sa Rodriguez Baybay, Barangay 35, Bacolod City paagi sa entrapment operation sang gintingob nga pwersa sang Criminal Investigation and Detection Group, Bacolod City Police Office, Bureau of Internal Revenue kag Philip Morris Philippines.
Suno kay Police Senior Inspector Kim Dominic Gamboa, pinuno sang CIDG Bacolod, nagreklamo sa ila ang Philip Morris nga ginapeke ang ila mga produkto rason nga ginkasa ang operasyon.
Nakuha sa possession sini sa Barangay 35 ang anom ka karton sang nagkalain-lain nga sahi sang peke nga sigarilyo.
Ginkadtuan man ang bodega nga iya ginakuhaan sa J Torres Subdivision sa Barangay Singcang kun sa diin narekober ang 32 ka box sang peke nga sigarilyo kag isa ka home-made shotgun nga may apat ka mga bala.
Nakapalagyo naman ang tag-iya sang bodega nga si Allan Alichan.
Suno kay Gamboa, si Mangoda ang ginpasakaan na sang kaso nga paglapas sa RA 8424 ukon Tax Reform Act, RA 10591 ukon Comprehensive Law on Firearms and Ammunitions, kag RA 8293 ukon Intellectual Property Code of the Philippines.
Si Mangoda ang priso sa karon sa custodial facility sang CIDG Bacolod samtang yara naman sa BIR ang nakumpiskar nga mga sigarilyo.
May yara sang 14 ka mga kabataan ang lalaki nga nadakpan sa entrapment operation kag nakuhaan sang apat ka milyon ka pesos nga balor sang peke nga mga sigarilyo.
Sa interview sang Bombo Radyo, ginpahayag ni Mangoda nga walo sa iya mga kabataan ang nagaistar sa karon sa ciudad samtang ang anom naman ang nabilin sa Mindanao.
Suno diri, tatlo na ka bulan ang pagbaligya niya sang peke nga sigarilyo bilang source sang income.
Gin-ako man sini nga halin sa Metro Manila ang iya nga supply apang may yara man sang supplier nga yari diri sa Bacolod.
May kaangtanan sini, nagpaandam ang Bureau of Internal Revenue sa mga nagabaligya sang peke nga sigarilyo nga untatan na ini.
Suno kay BIR Revenue Region No. 12 Director Eduardo Pagulayan, hugot ang ila kampanya batok sa peke nga mga produkto bangud wala ini nagalabay sa ahensya rason nga wala man sang buwis.
Si Mangoda ang ginpaidalom sang BIR sa surveillance sa sulod sang duha ka semana matapos magreklamo ang Philip Morris Philippines.
