Ginalantaw sang Secretary General sa Sentrong Samahan ng mga Tsuper at Operators Negros nga kalabanan sa mga drivers sang traditional jeepney units ang indi magbaligya sang ila units sa gobyerno sa balor nga P50,000.
Ini kasunod sa pahayag sang Department of Transportation (DOTr) nga ang ahensya ang magabakal sang unconsolidated jeepneys sa mas mataas nga presyo sa baylo nga ini ang ibaligya sa junkshop.
Nahibaluan nga kun sa junkshop ibaligya ang mga jeepney units, ang presyo ang magadangat lamang sa P30,000.
Apang sa interview sang Bombo Radyo Bacolod kay Junjun Asis, kun magbakal sa autoshop, ang P50,000 ang balor pa lamang sang transmission ukon gear box.
Panindugan sini nga tuman ka sakit para sa mga drivers nga ginbalhasan sa pagpangita sang paagi agud mapa-eskwela ang ila nga mga kabataan, sa baylo tuman ka gamay lamang ang bili sang salakyan nga nagbuhi sa ila.
Kwestyon pa ni Asis nga kun may kaangay nga budget ang gobyerno, kuntani ini ang ginpahulam na lamang ini sa mga operator sa pag-upgrade sang ila nga mga salakyan agud nga magtahom ang unit kag makapasar sa requirement sang public utility vehicle (PUV) modernization program.
Paathag sini nga madamo sang mga traditional jeepneys nga karag-karag na bangod sila ang ginapahog humalin pa lamang sang 2017 nga iphaseout gani ini ang wala na lamang ginpakay-o.
Kwestyon sang mga ini kun ngaa ang mga drivers kag operators nga nagabayad man sang husto nga taxes kag wala man nagapakilimos sa gobyerno, amo ang makaluluoy sa palpak nga programa.
Panindugan sini nga tuman ka dako ang perwisyo sang PUV modernization partikular na sa Bacolod City kun sa diin dako nga porsyento ang indi na makabyahe.
Dugang pa sini nga madamo sa mga traditional jeepneys nga matahom pa kag may maayo nga brand sang makina.
Paathag sini nga ang makina sang jeep ang nagadangat sa P150,000.
Nagapati ini nga luyag baklon sang gobyerno ang mga traditional jeepney units bangod sila ang may kliyente na nga magabakal kun sa diin sila ang may dako nga ginansya.
Sa ginabuhat sang gobyerno, pahayag ni Asis nga kaangay nga ginatudluan lamang nila ang mga tawo nga magsulod sa katuntuhan kag illegal kasubong man magrebelde sa gobyerno.
