BACOLOD CITY – Wala nangin upang ang pag-angkon sang pamilya sa linghod nga edad agud makatapos ang isa ka magkahagugma sa Bacolod City College (BCC).
Ginpakigbahin sang mag-nobyo nga Jan Vincent Gonzales kag Maricel Saura sa linibo ka mga tagpalamati sang Bombo Radyo ang ila estorya agud mapulutan sang leksyon kag subong man inspirasyon.
Si Maricel ang nagbusong sa edad nga 16 samtang yara ini sa first year sa BCC samtang second year naman si Jan Vincent.
Tuman nga kahadlok ang ginbatyag sang duha upod sa kabalaka kun paano batunon sang tagsa nila ka mga pamilya ang ila gindangatan samtang sila ang ginalauman nga makabulig sa ila mga manghod.
Apang sa pihak sang paghusgar sa ila, ginsarang sang magkahagugma ang mga pagpanghangkat tubtob nga mapilitan si Jan Vincent nga magtrabaho bilang isa ka callcenter agent agud masustentuhan ang ila pamilya kag lakip naman ang pagbalik nila sa pag-eskwela.
Makaapat ka beses naman sila nga ginpahalin sa ila ginadayunan nga boarding house bangud wala makabayad sang arkila.
Suno kay Maricel, agud mabuligan ang iya partner, nagbaligya ini sang kun ano-ano samtang napilitan man ini nga dal-on ang lamharon pa nila nga anak sa sulod sang eskwelahan.
Sanday Maricel kag Jan Vincent pareho nga nag-graduate sa kurso nga Bachelor of Science in Business Administration, major in Marketing Management.
