Pag-atubang sang 18 ex-Marines sa Senado, mangin “circus” lamang suno kay Senate Blue Ribbon Committee chairperson Ping Lacson

Ginbatikos ni Senator Panfilo Lacson ang ideya sa pag-atubang sa Senado sang 18 ka mga anay Marines angot sa gina-alegar iregularidad sa mga proyekto sa flood control, kag ginpahayag niya nga mangin “circus” lamang ang resulta sini.

Suno sa nagapanguna sa Senate blue ribbon committee, ginapatihan nga kulang sa kredibilidad ang mga pahayag sang mga anay sundalo nga nagahambal nga ginmanduan sila nga magdul-ong sang P805 billion nga kickback naggikan sa flood control projects para sa mga pila ka mga politiko, kalakip na diri sanday anay House Speaker Martin Romualdez kag anay Ako Bicol party list Rep. Zaldy Co.

Suno kay Lacson, nagapatigayon pa ini sang pauna nga beripikasyon sa background sang mga nasambit nga indibidwal antes magpatawag sang hearing angot sa gina-alegar “cash delivery scheme.”

Suno kay Lacson, kun umpisahan na nila ang hearing kag madangat lamang sa pag-cite for contempt sa 18 ka persona, mahimo nga ang senado pa ang kabigon nga kontrabida kag nagapang-harass.

Suno diri, mahimo magamit lamang ang Senado bilang plataporma para sa mga indi mapatihan nga mga istorya.

Gin-paathag sang senador nga daw imposible ang logistic sang gina-alegar P805 billion nga cash.

Gin-basehan ni Lacson ang komputasyon ni late Senator Ramon Revilla Sr. sa tinalikdan nga impeachment trial ni anay Presidente Joseph Estrada, nga ang P1 million ang nagabug-at sang isa ka kilo, gani suno diri, dapat ang P805 billion ang may kabug-aton nga 805 metric tons magluwas pa sa kabug-aton sang maleta.

Sa pagbanta ni Lacson, kun kaigo ang P60 million sa maleta, nagakinahanglan sang 13,416 ka maleta agud mapadala ang kabug-usan nga balor.

Dugang pa niya, kun mahimo maproseso ang P500 million kada adlaw, ginabanta nga magdangat sa lima ka tuig kag tunga ang pagdul-ong sini kag dapat tubtob karon, nagadul-ong pa sila gihapon sang kwarta kun nag-umpisa sila sang 2023.

Gin-kwestyon man niya kun may mabilin pa kay Co kun napanagtag na ang kabug-usan nga P805 billion ukon isa lamang ini ka messenger.

Samtang, nagfile sang resolusyon si Sen. Imee Marcos agud maimbestigaran sa senado ang mga alegasyon sang mga gina-alegar anay Marines.