Ginpa-athag sang Vice President and Chief Operating Officer sang Negros Power and Electric Corporation (NEPC) kun ano kag sin-o ang makabenepisyo sa Lifeline Rate Subsidy Program (LRSP).
Sa interview sang Bombo Radyo Bacolod kay Engineer Joe-Mel Zaporteza, ang lifeline rate kapin duha ka dekada na nga yara sa bill apang sang Marso 2026 may yara sang mga bag-o nga layi para diri.
Suno diri, ang LRSP makahatag sang discount sa mga 4Ps (Pantawid Pamilyang Pilipino Program) beneficiaries sa ila balayran sa kuryente paagi sa pagkuha sang 0.1 cents per kWh sa kada konsumedor.
Suno diri, kaangay na lamang kun ang isa ka panimalay nagakonsumo sang P200 per month, may yara sang subsidy nga P2 nga ihatag sa 4Ps.
Ang lifeline subsidy ihatag sa mga beneficiaries sang 4ps nga nagakonsumo sang 80 kWh panubo kada bulan apang kun magsobra naman ang ila naconsume nga kuryente, indi na sila mahimo maka-avail sa subsidy.
Suno kay Zaporteza, ang DSWD nagahatag sang listahan sang qualified costumer sang 4Ps kag kun sin-o ang yara sa listahan, automatic na nga kwalipikado ang benepisyaryo.
