Indi pa mabal-an kun tubtob san-o ipatuman ang executive order No. 11 ukon pagdumili sa pagdungka sang mga barko nagikan sa China, Hong Kong kag Macau sa pantalan sang ciudad bangud sa coronavirus disease (COVID-19) scare.
Kahapon, ginpagwa ni Mayor Evelio “Bing” Leonardia ang Executive Order No. 11 Series of 2020 nga nagamando sang ban.
Bangud gindeklarar sang World Health Organization (WHO) nga public health emergency of international concern ang COVID-19 kag gin-aprubahan man sang inter-agency task force ang travel ban sa China suno sa alkalde, nagpatigayon man sang preventive measures ang Bacolod City government agud maproteksyunan ang mga residente sa posible nga exposure sa carriers ukon sources sang COVID-19.
Gin-athag man sini nga wala sang problema nga maka-dock sa mga pantalan sa Bacolod ang iban nga foreign vessels magluwas lamang sa special administrative region (SAR) sang China.
Nagpangabay man ini sa Bacolod City Police Office nga mag-deploy sang pulis sa Bredco Port agud magbulig sa Philippine Coast Guard sa pag-monitor nga wala sang may makapanaog sa barko.
Samtang, ginpanindugan naman ni City Legal Officer Atty. Joselito Bayatan nga ang consignee sang dala sang MV Unicorn Bravo ang may salabton man.
Suno kay Bayatan, kun wala nagpahanugot ang consignee nga batunon sini ang unod sang vessel, indi man kuntani ini mag-anchor malapit sa Bacolod port.
Nahibaluan nga ginpaidalom sa quarantine ang barko nagikan sa China nga magadala kuntani sang semento sa Bacolod.
Ang MV Unicorn Bravo ang may 19 ka mga crew kun sa diin 15 diri ang Chinese nationals samtang apat naman ang nagikan sa Myanmar.
