Mas pasanyogon pa ang pagpatigayon sang inspection sa mga warehouses sa ciudad sang Bacolod kasunod sa pagraid sa isa ka warehouse nga may raw materials sa paghimo sang illicit cigarettes sa Barangay Alijis, Bacolod City, kahapon.
Sa interview sang Bombo Radyo Bacolod kay Mayor Greg Gasataya, kahapon may yara kuntani siya sang meeting kaupod ang kapulisan apang wala natigayon bangod may ginpatigayon nga raid sa isa ka planta sang sigarilyo sa Barangay Calumangan, Bago City.
Suno diri, pila lamang ka oras ang naglabay sang nakig-angot sa iya ang Bacolod City Police Office nga may ginaconduct nga raid sa isa ka warehouse sang raw materials sa paghimo sang sigarilyo sa Barangay Alijis, Bacolod City.
Suno kay Gasataya, gilayon siya nga nagrequest sa Business Permit and Licensing Office (BPLO) para sa inspection kag boluntaryo man nga ginbuksan sang mga tawo ang warehouse kag didto nakumpirmar nga may yara sang raw materials sa paghimo sang illicit cigarettes.
Sang nahibaloan ni Gasataya ang natabo, gilayon man siya nga nagpadulong sa area kag nakita sini mismo nga may yara man sang mga equipment apang iban guba na.
Pahayag sini, dako ang iya pagpati nga may koneksyon ang warehouse sa barangay Alijis kun diin nastock ang materials sa paghimo sang sigarilyo, sa raid nga ginpatigayon sa planta sang sigarilyo sa Bago City.
Sa karun, ginahibalo pa kun sin-o ang nagapanag-iya sang warehouse.
Samtang, nagpasalig naman ini nga mas pasanyogon pa ang pag-inspect sa mga warehouses sa ciudad.
