Ginmandu sang Civil Service Commission ang pag-reinstate ukon pagpabalik sa pwesto si Atty. Juliana Carbon bilang general manager sang Bacolod City Water District (BACIWA).
Sa desisyon sang Civil Service Commission central office, nga pirmado sang chairman sini nga si Alicia dela Rosa-Bala, nga eksklusibo nakuha sang Bombo Radyo Bacolod, ginmandu sang CSC-Central Office nga dapat nga magbalik sa pagpungko bilang general manager sang BACIWA si Atty. Carbon matapos nga ginbasura ang appeal nga ginsumiter sang Board of Directors sang water district.
Sa madumduman nga sadtong Hunyo 23, 2016 nga ruling nga pirmado ni CSC Region 6 Director IV Rodolfo Encajonado, gin-reinstate si Carbon matapos ginbasura ang motion for reconsideration sang BACIWA bangud nga napaslawan ang Office of the Government Corporate Counsel sa pag-presentar sang supisyente nga argumento para sa pagligwat sang una nga desisyon sang Komisyon.
Ginbaliskad man ang resolusyon sang BOD nga nagadesignar kay Engr. Mario Macatangay bilang tal-os kay Carbon.
Ginpadangat sang BOD sa CSC central office ang petition for review apang dalayon ini nga ginbasura.
Kadungan sini, ginmandu man sang Komisyon ang pagbayad sang salaries and backwages ni Carbon humalin sadtong Agusto 18, 2015 ukon ang adlaw nga nagbiya ini sa pwesto tubtob Hulyo 31, 2017.
Ang desisyon ang final and executory kag nagpaandam ang CSC central office nga kun indi magtuman ang BACIWA Board of Directors, sila ang pasakaan sang contempt.
