Ginreklamo sang pumuluyo sa Barangay San Jose, Binalbagan, ang naga-alingasaw nga baho nagikan sa suba sang nasambitan nga banwa bangod gina-alegar diri gina-ula ang water waste sang Binalbagan Sugar Company (BISCOM).
Sa interview sang Bombo Radyo Bacolod sa complainant nga nag-ayo nga indi na lamang hingadlan, masobra 20 ka pamalay malapit sa suba ang apektado kun sa diin may-ara na sang nagasakit ang tiyan.
Paathag sini nga humalin sadto, may mga bulan na kun sa diin naga-ula ang BISCOM sang higko sa suba, apang subong nga tuig, nangin tuman ka lala ang baho.
Suno sa tagreklamo, halos kada gab-i naga-ula sang higko ang BISCOM samtang sila ang indi naman makatulog.
Apisar sa kainit sang tiyempo, ginapili nalang sang mga ini nga magrumbot sang habol kun gab-i agud bisan paano mapahagan-hagan ang ila nagakapanimahuan./
Sang ginparate sa baho from 1 to 10, ginpahayag sang tagreklamo nga sobra pa sa 10 ang ila nagakapanimahuan.
Dugang pa sini nga sadto, may mga nagapanglaba pa kag nagapaligo sa suba, apang karun indi na ini mahimo bangod nag-itom na ang tubig.
Sadto, kun mag-ula sang higko ang kompanya, madamo pa sang nagapangisda bangod nagakalipungan ang mga isda, apang sa karun, mahimo nagpinalagyo na ang mga isda ukon nagkalamatay bangod sa kontaminado nga tubig.
Aminado naman ang tagreklamo nga wala pa niya napadangat sa Barangay ukon Banwa ang reklamo, sa baylo ini ang ginpost lamang nila sa social media.
