Ginpahayag sang kilala nga abogado nga pabor sa gobyerno ang pag-uli sang mga kwarta nga kinawatan sang mga involved sa anomalous flood control project.
Kahapon sa hearing sang Senate Blue Ribbon Committee, nagsabtanay sanday Sen. Rodante Marcoleta kag Justice Secretary Jesus Crispin Remulla sa ginhambal ni Remulla nga dapat ibalik anay ang mga kwarta nga ginkawat sang mga contractor antes sila ipaidalum sa ‘Witness Protection Program’ apang ginkwestyon naman ini ni Marcoleta kun bala gina-amyendahan ni Remulla ang layi.
Sa interview sang Bombo Radyo kay Atty Jomax Ortiz, bisan pa may yara sang layi, dapat mangin practical na lang kun iuli man sang mga contractor ang mga kwarta.
Suno diri, kun iuli mas pabor ini sa gobyerno sang sa hulaton pa nga matapos ang trial kag amo nga magpagwa sang order ang korte sang restitution nga wala na sang mabawi pa sa mga contractor bangod na-amat amat na nila pangbaligya ukon nagkaladula na ang mga dapat nga ipang-uli.
Pahayag ni Ortiz, wala na dapat sang awayan diri kun boluntaryo lang man nga ihatag kag wala man sang bayolasyon nga nakomiter kag dugang pa sini makabenepisyo pa diri ang gobyerno.
Sa tion naman nga matapos ang trial kag mahibaluan nga indi man kinawatan ang mga kwarta, mahimo man ini mabalik sang gobyerno… Sa pihak nga bahin, ginpahayag ni former Bacolod City Councilor Atty. Renecito Novero nga wala sang may nagadumili kag nagapahanugot nga layi sa restitution ukon pagbalik sang kwarta nga ginkawat sang mga involved sa anomaloso nga flood control projects agud nga makasulod sa Witness Protection Program.
Sa interview sang Bombo Radyo kay Novero, yara na ini sa paghangpanay sang duha ka partido, nga amo ang partido sang estado kag sang akusado.
Suno diri, wala sang rason kun batonon man ukon indi ang ginbalik nga kinawatan bangod ang restitution ang nagapakita sang kabutigan, pagpangawat kag katontohan sang akusado.
Apang, paathag sini nga ang least guilty ang pilion bilang state witness nga maka-angkon sang immunity sa kaso kag amo nga magatudlo sa kaupdanan sini nga mas may dalagko nga sala kag kinawatan.
Ang problema lamang diri amo nga ang pagpili sa state witness nga may pinakagamay nga kinawatan nga kwarta bangod halos tanan nga akusado wala man nagasugid sang matuod.
Samtang, ang mapilian naman nga state witness nga wala nagakooperar ang mahimo nga mabalik bilang akusado.
