Ginabantayan sang Department of Agriculture (DA) ang pagbag-o sang presyo sang bugas kag sibuyas sa merkado sa tunga sang ginreport nga mataas nga retail prices, bisan pa nga nagapabilin nga manubo ang farmgate price, partikular na para sa sibuyas.
Suno sa mga market analyst, nagsaka ang presyo sang bugas kag sibuyas bangud sa atrasado nga pag-abot sang imported supplies.
Pahayag ni Agriculture Secretary Francisco Tiu Laurel Jr., gina-address ini sang DA agud mapabilin nga barato ang pagkaon kag masiguro nga makabaton sang patas nga kita ang mga mangunguma.
Ginalauman sang DA nga magabalik sa normal ang presyo sang bugas sa tunga-tunga sang Marso kadungan sang harvest kag pag-abot sang imports.
Ginapasangkad man sang DA ang pagpatuman sang Benteng Bigas, Meron Na nga programa sa mga dalagko nga ciudad.
Samtang, ginatun-an man sang ahensya ang mga tikang agud mapataas ang farmgate price sang sibuyas antes ang peak harvest sa bulan sang Marso kag Abril.
