Ginsuguran na sang Bacolod City Government ang pagbaligya sang P20 per kilo nga bugas sa pila ka mga Barangay sa Bacolod City sang Lunes.
Sa interview sang Bombo Radyo Bacolod kay Brenda Burdeos, Project Development Officer IV sang City Cooperative and Livelihood Development Office (CCLDO), nagapadayon sa karun ang pagdul-ong sang National Food Authority (NFA) sang bugas sa City Government kun sa diin nagdangat na sa 1953 ka sako sang bugas ang nadeliver.
Suno kay Burdeos, nadugangan man ini kahapon matapos nga nagdeliver ang ahensya sang 491 ka sako.
Suno diri, ginatinguhaan sang NFA nga makadeliver adlaw adlaw apang ginabanta lamang nila nga indi man matam-an ang ila nga rice mill.
Kapin 400 ka sako sang bugas ang madeliver kada adlaw.
Ginpahayag man sini nga mga lima ka Barangay ang ila nga nadul-ongan sang bugas sang Lunes nga ginalakipan sang Barangay 1, 2, 3, 6 kag 9.
Samtang kahapon nakapadala man sila sang inugbaligya nga bugas sa Barangay 12, Sum-ag, Singcang, Tangub, Handumanan, Cabug kag Mansilingan.
Ginatarget nga 70 kasako sang bugas apang sa numbered Barangays wala man nila napaubos bangud mga 40 sakos lamang ang naubos gani magahimo sila sang adjustments.
Ginpahayag man ni Burdeous nga isa lamang kaadlaw ang pagbaligyaanay sang bugas numbered Barangays agud nga mahatagan man sang tsansa ang iban nga Barangay nga makabakal sang bugas.
Suno diri, sa naeksperyensya nila kun nagabalik balik ang pagbaligya sang bugas ang nagabakal ang nagailis lamang sang bayo agud nga makabakal liwat gani ang iban wala na sang tsansa nga makabakal.
Sa Barangay Hall naman magabaligya sang bugas bangud kun sa satellite market indi safe ang bugas kag mahimo mabasa bangud wala sang atup.
