Ginalauman na ni Bacolod City Mayor Alfredo Benitez ang pagbasura sang election protest nga ginpasaka sang kampo ni former Mayor Evelio “Bing” Leonardia batok sa iya kag ginpahayag nga indi ini dapat pagseryosohon.
Sang damlag lang, ginbasura sang COMELEC Second Division ang petisyon bangud ini ang “improperly filed and insufficient in form and substance”.
Suno kay Benitez, humalin pa sadto, nagapati ini nga indi dapat pagseryusuhon ang ginfile nga protest batok sa iya bangud matawhay kag matinlo ang Eleksyon sang tinalikdan nga Mayo.
Suno sa iya, wala sang may nareport nga mga iregularidad kag wala na sang maayo nga himuon ang pihak nga kampo.
Suno diri, siya ang padayon lamang nga magatrabaho bangud natapos na ang Eleksyon kag malapit na lamang ang 2025 gani magafocus ini sa mas importante nga mga butang agud makahatag sang maayo nga serbisyo para sa Bacolod.
