Nangin matawhay ang pagpatigayon sang Masskara Kick-off Salubong kahapon magluwas lamang sa false alarm sa presensya sang bomba sa parking area sang Bacolod City Government Center (BCGC).
Sa interview sang Bombo Radyo Bacolod kay P/Maj Ritchee Gohee, station commander sang Bacolod Police Station 4, nagluntad ang false alarm alas-6:00 kagab-i matapos nga hinali nga nagpungko ang isa ka ido sang Explosive Ordnance Disposal and Canine Group sang Bacolod City Police Office (BCPO) sa atubang sang isa ka salakyan.
Nahibaluan nga ang pagpungko sang ido ang nagapatimaan nga may-ara sang bomba sa isa ka lugar.
Bangud sini, gilayon man nila nga gintawagan ang Explosive Ordnance Disposal team agud macounter check kag alas-7:30 sang gab-i nakumpirmar nga ini ang false alarm.
Ginalantaw sang mga ini nga mahimo nagpungko ang K-9 unit bangod sa contaminated ang lugar sang perfume ukon mahimo man nga bangod sa baho sang polbura.
Ang nasambit nga salakyan ang na-issue sa opisyal sang nakaligad nga administrasyon kag nabalik na sa syudad samtang ini ang madugay naman nga nakapark sa BCGC.
Sa pihak nga bahin ginpahayag man sini nga 80 ka mga police personnel ang nakadeploy kahapon sa Masskara Kick-off Salubong gikan sa Bacolod Police Station 4, 5, 10 kasubong man gikan sa Mobile Police Unit kag sa BCPO Headquarters.
Samtang masobra naman sa 200 ang mga nakadeploy nga force multipliers.
Ginalantaw ni Gohee nga sa masunod nga semana pa magadamo ang mga kapulisan bangod sa ginapaabot nga dugang nga augmentation sang Police Regional Office 6 (PRO 6) Headquarters.
